МИҚДОРИ НОКИФОЯИ НУРӢ

Душанбе, 19 сентябр. (АМИТ «Ховар», Лаззат Диловарзод).- Бино ба гуфти муовини аввали вазири кишоварзӣ Султон Валиев, соли ҷорӣ аз ҷониби ширкатҳо нуриҳои минералӣ барои соҳаи пахтакорӣ ба таври зарурӣ таъмин карда нашуд. Мувофиқи талабот барои соҳаи пахтакорӣ хоҷагиҳо ба 255 ҳазор тонна нуриҳои минералӣ зарурат доштанд. Мувофиқи маълумоти мавҷуда, ба хоҷагиҳо танҳо 68 ҳазору 713 тонна нурӣ дастрас гардид, ки ин 27 фоизи талаботро таъмин мекунад. Бо вуҷуди ташкил ёфтани нуқтаҳои фурӯш дар ноҳияҳои вилояти Суғд, Хатлон ва ноҳияҳои тобеи ҷумҳурӣ хоҷагиҳо ба миқдори зарурӣ нурии минералӣ, ки асоси баландҳосилист, таъмин нагардиданд, аз ин маълум мешавад, ки соли ҷорӣ ҳосили хуби пахта ба даст оварданаш то дараҷае мушкил мегардад.