МУҲОКИМАИ НАҚШАҲОИ ҲАМКОРИИ ТОҶИКИСТОН ВА ТУРКМАНИСТОН

Душанбе, 18 сентябр. (АМИТ «Ховар» Фарангис Раҳимова).- Вазири корҳои хориҷии Ҷумҳурии Тоҷикистон Ҳамрохон Зарифӣ зимни сафараш ба Париж дирӯз бо вазири корҳои хориҷии Туркманистон Рашид Муридов мулоқот кард. Онҳо масъалаҳои марбут ба вазъияти минтақа, зарурати ҳамоҳанг сохтани тадбирҳои ҳар ду ҷонибро дар масъалаҳои минтақавию байналхалқӣ ва проблемаҳои дигари мавриди таваҷҷӯҳашонро муҳокима карданд. Аз ҷумла лоиҳаи қатъномаи «Амнияти транзитии сӯзишворӣ, қувваи барқ ва нақши он дар таъмини рушди устувори иқтисодӣ ва ҳамкории байналхалқӣ» баррасӣ карда шуд, ки онро Ҳукумати Туркманистон таҳия намудааст. Р.Муридов изҳор намуд, ки қабули қатънома ба низоми равобити байналхалқии тиҷоратию иқтисодӣ таъсири мусбат расонида, ба ҳамкории мамлакатҳо ва минтақаҳо мусоидат мекунад.