МУҲОКИМАИ НАТИҶАҲОИ МУЛОҚОТИ ДУШАНБЕ ДАР ИРКУТСК

Душанбе, 11 сентябр.(АМИТ «Ховар», Покиза Маҳмадбекова). — Имрӯз дар шаҳри Иркутск маҷлиси Шӯрои тиҷоратии Созмони ҳамкории Шанхай баргузор гардид. Дар он натиҷаҳои мулоқоти сарони давлатҳои аъзои созмон дар шаҳри Душанбе муҳокима карда шуданд, ки 28 август баргузор гардида буд. Маҷлиси Шӯрои мазкур дар доираи мулоқоти иқтисодии навбатӣ бахшида ба проблемаҳои кӯли Байкал баргузор гардид. Иштирокчиёни маҷлис масъалаҳои марбут ба фаъолияти сохторҳои ҳифзи саломатии СҲШ – ро дар мамлакатҳои аъзои созмон, барномаҳои муштараки энергетикӣ, ҳамкориро дар соҳаи кишоварзию саноатӣ, таҷрибаи ташкили мактабҳои олии шабакавӣ ва ташаббусҳои байнидавлатиро дар бобати рушди соҳаи суғурта ва ғайра муҳокима карданд. Мухбири АМИТ «Ховар» хабар медиҳад, ки дар маҷлиси мазкур аз Тоҷикистон раиси Палатаи савдо ва саноати мамлакат Шариф Саид иштирок намуд.