МУЛОҚОТИ ВАЗИРОНИ КОРҲОИ ХОРИҶИИ ТОҶИКИСТОНУ ЮНОН

Душанбе, 18 сентябр. (АМИТ «Ховар», Фарангис Раҳимова). – Вазири корҳои хориҷии Тоҷикистон Ҳамрохон Зарифӣ 17 сентябр дар Париж бо вазири корҳои хориҷии Ҷумҳурии Юнон Дора Бакояни мулоқот кард. Мусоҳибон изҳор намуданд, ки равобити деринаи таърихии ҳар ду давлат барои густариш додани ҳамкории дуҷонибаи доманадор шароити мусоид муҳайё месозад. Дар робита зарурати бунёди заминаи қонунии ҳамкорӣ таъкид карда шуд. Вазирон зикр намуданд, ки дар бораи ҳамкории тиҷоратию ва техникию иқтисодии ҳар ду кишвар меморандум имзо кардан зарур аст. Қайд карда шуд, ки Тоҷикистону Юнон дар соҳаи истифодаи манбаъҳои ғайримуқаррарии қувваи барқ ва гармӣ ҳамкорӣ карда метавонанд. Вазири корҳои хориҷии Юнон изҳори умед кард, ки соли 2009 дар мавриди муҳайё гардидани имконият ҳамчун раиси Созмони амнияту ҳамкории Аврупо барои боздиди корӣ ба Тоҷикистон сафар хоҳад кард.