ОЗМОИШГОҲИ ГУМРУК СОҲИБИ ТАҶҲИЗОТИ ТАШХИСИ «МИЛИХРОМ-5-3» ГАРДИД

Душанбе, 17 сентябр. (АМИТ «Ховар», Мавҷуда Давлатзода).- Комиссияи Аврупо оид ба кӯмаки техникӣ ба озмоишгоҳи Хадамоти гумруки Тоҷикистон ба маблағӣ 270 ҳазор евро дастгоҳи «Милихром-5-3» тӯҳфа кард, ки барои ташхиси хусусиятҳои физикию-химиявӣ ва сифатию-миқдории намудҳои мухталифи мол, аз ҷумла озуқа, дору, маҳсулоти нафт, маводи нашъадор ва ғайра истифода бурда мешавад. Аз маркази матбуоти Хадамоти гумруки назди Ҳукумати Ҷумҳурии Тоҷикстон ба мухбири АМИТ «Ховар» хабар доданд, ки мақсади асосии гумрук ғанӣ гардонидани буҷети мамлакат ва ҳимояи манфиатҳои иқтисодии он мебошад. Вазифаи асосии озмоишгоҳ мусоидат ба тақвияти назорати гумрукӣ ва мақомоти гумрукӣ мебошад. Сардори озмоишгоҳ Сафо Мӯсоев қайд кард, ки вазифаи асосии он ташхиси аниқи сифати мол ва бо ин роҳ пешгирии ворид сохтани молҳои бадсифат ба қаламрави мамлакат мебошад. Роҳбарияти хадамот барои гузаронидани тахшисҳои гумрукӣ соли гузашта бинои озмоишгоҳро пурра тибқи тавсияҳои ташкилоти ҷахонӣ сохта ба истифода дод. Ӯ ҳамчунин зикр кард, ки таҷхизоти мазкур барои сари вақт ташхис кардани намудҳои гуногуни мол дар озмоишгоҳ барои молворидкунандагон ва тоҷирон хеле муфид аст.