ТУХМӢ БОЯД БОЗПАС ГАРДОНДА ШАВАД

Душанбе, 19 сентябр. (АМИТ «Ховар», Лаззат Диловарзод).- Бо дастгирии Ҳукумати Ҷумҳурии Тоҷикистон Вазорати кишоварзӣ баҳри рушди соҳаи ғаллакорӣ аз Пажӯҳишгоҳи Лукяненкои кишвари Краснодари Федератсияи Русия, хоҷагии Латиф Муродови ноҳияи Ҳисор ва хоҷагии Мукаррамови ноҳияи Исфара дар маҷмӯъ 1332,2 тонна гандуми тухмӣ харидорӣ намуда, ба хоҷагиҳои ғаллакори вилояту шаҳр ва ноҳияҳо дар асоси шартнома супорид. Аз он ҷумла ба вилояти Мухтори Кӯҳистони Бадахшон — 80 тонна вилояти Суғд — 125, вилояти Хатлон 770,7 ва ноҳияҳои тобеи ҷумҳурӣ 305,5 тонна гандуми тухмӣ супорида шудааст. Акнун хоҷагиҳоро зарур аст, ки миқдори тухмии гандумро, ки 1332,2 тоннаро ташкил медиҳад, ба Вазорати кишоварзӣ бозпас гардонанд.