ЯРМАРКАИ ҚАЛБАКӢ

           Душанбе, 3 сентябр. ( АМИТ «Ховар», Лаззат Диловарзод).- Сокинони шаҳр чанд сол боз шоҳиди як иқдоми хуби шаҳрдорӣ гардиданд. Дар пойтахти кишвар дар рӯзҳои шанбе ва якшанбе гузаронидани намоиш ва фурӯши маҳсулоти кишоварзӣ ба ҳукми анъана даромадааст.          31 август ноҳияи Ҳисор ярмаркаи навбатии маҳсулоти кишоварзии худро дар бозори Қарияи Боло ташкил дод. Тибқи иттилои директори бозор Валӣ Давлатов ноҳияи Ҳисор дар ин рӯз 15 тонна маҳсулоти кишоварзиро пешкаши харидорон намуд, аммо дар асл он аз 7-8 тон зиёд набуд. Баробари ин ба сифати маҳсулот касе диққат намедод. Маҳсулоти ба бозор воридшуда бо сифати хеле паст пешкаши харидорон карда шуд. Фурӯшандаҳои аз одоби муошират дур таъби дили мардумро низ хира месохт.          Ба зами ҳамаи ин, нархҳои аз тарафи комиссия муайяншуда, ҳинни савдо риоя намешуданд. Ҳамаи ин корҳо аз қалбакӣ будани ярмаркаи онрӯза, ки ноҳияи Ҳисор баргузор намуд, далолат менамуд.