МЕЪЁРИ ТАВАРРУМ БА 12,7 ФОИЗ РАСИД

           Душанбе, 23 октябр. (АМИТ «Ховар», Покиза Маҳмадбекова). — Дар нӯҳ моҳи соли равон ҳаҷми Маҷмӯи Маҳсулоти дохилӣ (ММД) 12 миллиарду 374,8 миллион сомониро ташкил дод, ки ин нисбат ба ҳамин давраи соли гузашта 3 миллиарду 445,5 миллион сомонӣ зиёд мебошад, — гуфт зимни нишасти матбуотӣ Вазири молияи Ҷумҳурии Тоҷикистон Сафаралӣ Наҷмуддинов.           Ҳамчунин зикр гардид, ки гардиши савдои хориҷӣ дар ин давра ба 3 миллиарду 544,1 миллион долари амрикоӣ баробар гардидааст, ки 28,1 фоиз афзоиш ёфтааст. Ҳиссаи содирот дар гардиши савдои хориҷӣ 1146,8 миллион доллар ва ҳиссаи воридот бошад ба 2397,3 миллион доллари амрикоӣ баробар гардидааст.           Меъёри таваррум дар ин давра 12,7 фоизро ташкил дод. Ба баландшавии меъёри таваррум пеш аз ҳама омилҳои берунӣ, аз ҷумла афзоиши нархи маҳсулоти озуқаворӣ ва инчунин зиёд шудани тарифи қувваи барқ ва газ дар ҷумҳурӣ сабаб гардиданд. Ҳол он ки омилҳои фискалӣ (даромад, хароҷот ва касри буҷет) дар сатҳи зарурӣ ва устувор нигоҳ дошта шудааст.