НИШАСТИ РОҲБАРОНИ ХАБАРГУЗОРИҲОИ КИШВАРҲОИ УЗВИ СҲИ ДАР ТЕҲРОН

             Душанбе, 28 октябр. (АМИТ «Ховар», Марзия Саидова).-Аз 2 то 5 ноябри соли равон дар пойтахти Эрон -шаҳри Теҳрон нахустин иҷлосияи раисони хабаргузориҳои миллии кишварҳои аъзои Созмони Ҳамкории иқтисодӣ /СҲИ/(ЭКО) баргузор мегардад. Дар ин нишаст Ҷумҳурии Тоҷикистонро директори Агентии миллии иттилоотии Тоҷикистон «Ховар» Садриддин Шамсиддинов намояндагӣ менамояд.             Назар ба иттилои масъули бахши матбуоти Сафорати Эрон дар Душанбе Алиризо Ороста, дар нахустин иҷлосияи роҳбарони хабаргузориҳои миллии давлатҳои аъзои СҲИ масъалаҳои муҳими тақвияти ҳамкориҳо, бахусус табодули иттилоот миёни хабаргузориҳо, андӯхтани таҷрибаи ҳамдигар ва масъалаҳои дигари мавриди таваҷҷӯҳи раисони хабаргузориҳои давлатҳои аъзои ин созмони мӯътабар баррасӣ мегарданд. Дар назар аст, ки дар анҷоми нахустин иҷлосия раисони хабаргузориҳои миллии давлатҳои аъзои СҲИ санади муҳими ҳамкорӣ ба имзо расонанд.            Инчунин, тибқи барномаи иҷлосия иштирокдорони он аз ҷойҳои таърихию фарҳангии Эрон дидан менамоянд.            Бояд зикр кард, ки даҳ давлати ҷаҳон- Тоҷикистон, Афғонистон, Эрон, Покистон, Ӯзбекистон, Қирғизистон, Қазоқистон, Туркманистон, Озарбойҷон ва Туркия аъзои ин Созмони бонуфуз буда, Ҷумҳурии Тоҷикистон аз моҳи январи соли 1993 ба узвияти            СҲИ пазируфта шудааст. Кароргоҳи СҲИ шаҳри Теҳрон аст.