АКНУН ДУШАНБЕРО ДАР ТАВИЛДАРА МЕБИНАНД

              Душанбе, 11 декабр. (АМИТ «Ховар», Лаззат Диловарзод).- Бино ба иттилои муовини раиси ноҳияи Тавилдара Мирзо Сафаров, дар арафаи Иди Қурбон бо дастгирии Сарвари давлат Эмомалӣ Раҳмон мутахассисони Кумитаи телевизион ва радиои назди Ҳукумати ҷумҳурӣ антенаҳои мавҷгири телевизиони «Сафина» ва «Баҳористон»-ро дар ноҳияи Тавилдара насб намуданд. Акнун сокинони ду ҷамоати деҳоти  дурдасти ҷумҳурӣ — Миёнаду ва Сангвор тавассути мавҷгирҳои насбшуда барномаҳои се шабакаи телевизионии Душанберо тамошо карда метавонанд. Лозим ба ёдоварист, ки ин амали нек ҳангоми сафари кории Президенти кишвар ба ин минтақаи ҷумҳурӣ аз ҷониби сокинони ин ҷо дархост карда шуда буд. Акнун фазои иттилоотии кишвар боз як ноҳияро фаро гирифта, мардумро ба ҳаёти сиёсӣ, иқтисодӣ ва фарҳангии ҷумҳурӣ тавассути намоишҳои телевизион беҳтар ошно месохтагӣ хоҳад шуд.