БАРРАСИИ БАРНОМАИ ҲИФЗИ ИБОДАТХОНАИ БУДДОӢ ДАР АҶИНАТЕППА

            Душанбе,  12  декабр.(АМИТ «Ховар», Наргис  Бояхмедова). – Имрӯз  дар  Душанбе  маҷлиси  хотимавии  кумитаи  ҳамоҳангсоз  бахшида ба   барномаи  нигоҳ  доштан  ва  ҳифз  кардани  ибодатхонаи  буддоӣ  дар  Аҷинатеппа  баргузор  мегардад. Барномаи  мазкурро ЮНЕСКО  ва Бунёди  фарҳангии  Ҷопон  пешниҳод  кардаанд. Иштирокчиёни  маҷлис  даври  хотимавии   иҷрои  барномаро  мувофиқи  нақшаи  кории  соли  2008  ва тадбирҳои  минбаъдаи  ҳифзи  ин  ёдгории  қадима  баррасӣ  менамоянд.  Мухбири  АМИТ «Ховар»  хабар  медиҳад, ки  дар  маҷлис  намояндагони  вазоратҳои  корҳои  хориҷӣ,  фарҳанг,  Академияи  илмҳои  ҷумҳурӣ,  Бунёди Кластери  ЮНЕСКО  дар  Алмаато,  аъзои  комиссияи  миллии  Ҷумҳурии  Тоҷикистон  дар  масъалаҳои  ЮНЕСКО, коршиносони  байналхалқӣ  ва  ҳамоҳангсози  миллии  барнома  ширкат  меварзанд.