ДАР АЛМААТО «НОМГӮЙИ ДАСТХАТҲОИ ФОРСӢ» БА ТАБЪ РАСИД

Душанбе, 10 декабр. (АМИТ «Ховар», Бекназари Абӯбакр).- Дар нашриёти «Дайк-пресс»-и шаҳри Алмаато зери таҳрири олими шарқшиноси тоҷик Сафар Абдулло китоби «Номгӯйи дастхатҳои форсӣ» ба табъ расид. Дар китоби мазкур 112 дастхати Китобхонаи миллии Қазоқистон бори нахуст ба низом дароварда шуда, таърихи пайдоиш ва моҳияти илмии онҳо мухтасар шарҳ дода шудааст. Бояд зикр намуд, ки бори нахуст дар таърихи Китобхонаи миллии Қазоқистон номгӯйи дастхатҳои форсӣ таҳия гардидааст. Сафар Абдулло солҳои охир роҷеъ ба масоили шарқшиносӣ, бахусус дар бораи адабиёти тоҷику форс мақолаҳои зиёд ва маҷмӯаҳои гуногун таълиф намудааст.