КОРХОНАҲОИ НАВ БА ИСТИФОДА ДОДА ШУДАНД

         Қӯрғонтеппа,  30  декабр. (АМИТ «Ховар»,  Мурод  Сотиев). – Дар  шаҳри  Қӯрғонтеппа  ярмаркаи  маҳсулоти  корхонаҳои  саноатии  вилояти  Хатлон  баргузор  гардид. Мухбири  АМИТ «Ховар»  хабар  медиҳад, ки   намояндагони  корхонаҳои  саноатӣ  дар  ин  ҷо  дар  бораи  ҳамкорӣ ва  фурӯши  маҳсулот   созишномаю  қарордодҳо  имзо  карданд. Мудири  шӯъбаи   саноати  мақомоти  иҷроияи  ҳокимияти  давлатии  вилоят Абдуҷаббор  Баҳодуров  зикр  кард, ки  айни  ҳол  дар  вилояти  Хатлон  220 корхонаи  саноатӣ  фаъолият  дорад.  Дар  давоми  11  моҳи  соли  равон  дар  вилоят   15  корхонаи  нави   саноатӣ  ба  кор   дароварда  шуд.  Дар  натиҷа  бештар аз  800  нафар  бо  кор таъмин  гардид. Корхонаҳои  саноатии  вилоят   дар  ин  муддат  ба  маблағи  як  миллиарду 333 миллион  сомонӣ  маҳсулот  бароварданд.