ОХИРИН САБЗАВОТИ ТИРАМОҲӢ АЗ ҚИТЪАҲО ҶАМЪОВАРӢ МЕГАРДАД

          Душанбе, 3 декабр. (АМИТ «Ховар», Лаззат Диловарзод).- Бино ба маълумоти Маркази матбуот ва иттилооти Вазорати кишоварзӣ, охирин сабзавот ва зироатҳои полезӣ аз қитъаҳои ноҳияҳои ҷумҳурӣ ҷамъоварӣ мегарданд. Соли ҷорӣ истеҳсоли сабзавот дар корхонаҳои кишоварзии ҷумҳурӣ, хоҷагиҳои деҳқонӣ (фермерӣ) ба 211,5 ҳазор тонна расонида шуд, ки ин ба 65 фоизи нақша баробар аст.         Соли ҷорӣ дар хоҷагиҳои ҷамъиятӣ ва деҳқонӣ (фермерӣ) ҳосилнокиро аз ҳар гектар ба 179,4 сентнерӣ расониданд, ки ин нисбат ба соли гузашта 5,4-сентнерӣ зиёд аст. Ҷамъоварии зироатҳои полезӣ ва сабзавот дар корхонаҳои кишоварзӣ ва хоҷагиҳои деҳқонӣ — фермерӣ то 1-уми декабри соли ҷорӣ ба 222 ҳазору 649 тонна расонида шудааст, ки нисбат ба ҳамин давраи соли 2007  ба андозаи 124 ҳазору 79 тонна зиёд мебошад.