ТЕАТР БАЪДИ ТАНАФФУСИ ТӮЛОНӢ БА ФАЪОЛИЯТ ШУРӮЪ КАРД

Хоруғ, 3 декабр. (АМИТ «Ховар», Л.Додоев).- Театри мусиқию драмавии шаҳри Хоруғ баъди танаффуси тӯлонӣ бо барномаҳои рангини консертӣ ба сафари ҳунарӣ баромад. Дастаи ҳунарии «Навои Бадахшон», ки дар заминаи театр таъсис ёфтааст, таҳти сарпарастии ҳофизи хушовоз Абдушаҳид Саодатшоев бо барномаи консертӣ ба навоҳии Шуғнону Роштқалъа сафар кард. Ҳунарпешагонро дар ҷамоатҳои деҳоти Роштқалъаю Тусиёни ноҳияи Роштқалъа ва ноҳияи Шуғнон самимона истиқбол гирифтанд. Тавре роҳбари Раёсати фарҳанги вилоят Муҳиддин Пайшамбеев иттилоъ дод, рӯзҳои наздик дастаи ҳунарӣ дар деҳаҳои навоҳии Рӯшону Ванҷ бо консерт баромад мекунанд. Аз моҳи феврал бошад, ба сафари ҳунарии шаҳру навоҳии вилоятҳои ҷумҳурӣ мебароянд.