ҚОНУН ДАР БОРАИ ШИРКАТИ СОҲИБМУЛКОНИ МАНЗИЛ ҚАБУЛ КАРДА МЕШАВАД

                           Душанбе, 26 январ.(АМИТ «Ховар», Марзия Саидова).- Лоиҳаи Қонунҳои Ҷумҳурии Тоҷикистон «Дар бораи нигоҳдории биноҳои бисёрҳуҷрагӣ ва ширкати соҳибмулкони манзил», «Дар бораи ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҳифзи ҳавои атмосфера», «Дар бораи барӯйхатгирии аҳолӣ», дар хусуси дароз намудани мӯҳлати баррасии лоиҳаи Қонуни Ҷумҳурии Тоҷикистон «Дар бораи таърихи қарз» аз масъалаҳое буданд, ки 26 январ дар ҷаласаи Шӯрои палатаи поёнии парлумони мамлакат, ки таҳти раёсати Раиси Маҷлиси намояндагони Маҷлиси Олии ҷумҳурӣ Сайдулло Хайруллоев доир гардид, баррасӣ шуданд.                           Масъалаҳои мазкурро Раиси Кумитаи Маҷлиси намояндагон оид ба энергетика, саноат, сохтмон ва коммуникатсия Мирзошариф Исломиддинов ва мудири шӯъбаи ҳуқуқи Маҷлиси намояндагон Шарофиддин Зоиров шарҳ доданд. Зикр шуд, ки ҳадафи қабули ин қонунҳо тақозои ҳаёти иқтисодию иҷтимоии ҷумҳурӣ буда, ҷиҳати мукаммалгардонии санадҳои ҳуқуқию меъёрии кишвар нақши муассир мегузоранд.