БИНОИ НАВИ ФАКУЛТАИ МЕЪМОРИИ ДОНИШГОҲИ ТЕХНИКӢ СОХТА МЕШАВАД

               Душанбе, 22 январ. (АМИТ «Ховар», Людмила Дубинина). — Ректори Донишгоҳи техникии ҷумҳурӣ Анвар Абдурасулов дар ҷараёни нишасти матбуотӣ ба журналистон хабар дод, ки яке аз проблемаҳои ҷиддии имрӯза таъмини омӯзгорон ва донишҷӯён бо хобгоҳҳо ба шумор меравад. Зикр шуд, ки айни ҳол дар баробари сохтмони бинои таълимии факултаи меъмории донишгоҳ дар маҳаллаи Ҳаёти нав тармими бинои шашошёнаи хобгоҳ барои донишҷӯён дар маҳаллаи 33 — юм оғоз ёфтааст.               Сохтмони хобгоҳ ҳанӯз дар замони шӯравӣ оғоз ёфта буд. Имрӯз бо назардошти талаботи нави меъморӣ ба он дигаргуниҳо дохил карда шуданд. Аз хазинаи эҳтиётии Президент барои тармими хобгоҳ, сохтмони бинои нави факулта ва бо асбобу анҷоми зарурӣ таъмин кардани онҳо 2 миллион сомонӣ ҷудо карда шуд. Сохтмони бинои нави факулта соли 2010 анҷом меёбад, гуфт А.Абдурасулов.