СОҲИБКОРОН БОЯД ВАЗИФАҲОЯШОНРО СОФДИЛОНА ИҶРО КУНАНД

                 Душанбе, 22 январ. (АМИТ «Ховар», Людмила Дубинина). — Ба ақидаи раиси Иттиҳоди миллии тиҷорати хурду миёнаи Тоҷикистон Матлуба Ӯлҷабоева ташкили ду минтақаи озоди иқтисодӣ — минтақаҳои озоди иқтисодии «Суғд» ва «Панҷ» намунаи равшани иқдоми воқеии ислоҳоти иқтисодиёти мамлакат мебошад. Ҳадафи ин тадбир мавриди истифода қарор додани нерӯю имкониятҳои нави истеҳсолӣ ва технологияҳои навтарини замонавӣ аст. Танҳо ислоҳоти куллии ҳамаи соҳаҳои иқтисодиёт барои пешгирии бӯҳрони молиявӣ ва коҳиши истеҳсоли мол натиҷаҳои самарабахш дода метавонад, гуфт М. Ӯлҷабоева.                Вай зикр кард, ки сиёсати кадрҳо ва ба низоми идора ҷалб намудани қувваҳои тоза дар ислоҳоти системаи идораи давлатӣ нақши муҳим гузошта метавонанд.                Ба қавли коршинос, ислоҳоти низоми андоз низ зарур аст. Бо ин мақсад Кодекси нави андозро таҳия кардан лозим аст, ки мазмуну мундариҷаи он ҳам ба кормандони хадамоти андоз ва ҳам ба соҳибкорону тоҷирон фаҳмо бошад. Мавҷудияти низоми андозбандии дубора комилан норавост, зеро гурӯҳҳои алоҳида инро ба манфиати худ истифода мебаранд. Дар натиҷа дараҷаи рақобатпазирии молҳои сохти ватанӣ коҳиш меёбад. М.Ӯлҷабоева дар хотима изҳор намуд, ки ҳукумат ба манфиати тоҷирону соҳибкорон тадбирҳои самарабахш меандешад, онҳо ҳам бояд вазифаҳояшонро дар назди давлат софдилона иҷро кунанд.