АРЗИШИ ДОЛЛАР НИСБАТИ СОМОНӢ ТОРАФТ БОЛО МЕРАВАД

                   Душанбе, 4 феврал. АМИТ «Ховар», Покиза Маҳмадбекова). — Рӯзҳои охир арзиши доллари ИМА нисбати сомонӣ якбора хеле баланд гардид. Масалан, 3 феврал дар бунгоҳҳои табдили пул дар бозорҳои «Саховат» ва «Корвон» 1 доллари ИМА бо 3 сомонию 85 дирам иваз карда шуд. Имрӯз арзиши доллар дар пойтахт ба 4 сомонӣ баробар шудааст.                  Аз Ҷамъияи саҳҳомии «Агроинвестбонк» ба АМИТ «Ховар» хабар доданд, ки дар бунгоҳҳои мубодилаи пули бонк 2 феврал як доллари ИМА ба ивази 3,75 сомонӣ харида, ба ивази 3,77 сомонӣ фурӯхта шуд. Дар бунгоҳҳои мубодилаи пули Ҷамъияти саҳҳомии Бонки рушди Тоҷикистон рӯзи душанбе як доллари ИМА бо 3,78 сомонӣ ва имрӯз бо 3 сомонию 90 дирам иваз карда шуд. Бонки миллии Тоҷикистон хабар медиҳад, ки арзиши расмии доллар нисбати сомонӣ 3 сомонию 72 дирам мебошад. 3 феврал арзиши як доллари ИМА ба 3 сомонию 68 дирам баробар буд.