ОЗМУН БАРОИ ДАРЁФТИ ҶОИЗАҲОИ АДАБӢ

                Душанбе, 13 феврал. (АМИТ «Ховар», Лутфия Эшонқулова).- Иттифоқи нависандагони Тоҷикистон барои дарёфти ҷоизаҳои адабии ба номи Саддридин Айнӣ ва Мирзо Турсунзода озмун эълон намуд. Тавре ба АМИТ «Ховар» муовини аввали Раиси Иттифоқи нависандагон Абдулҳамид Самадов хабар дод, аз рӯи шартҳои озмун иштирокчиён бояд асарҳои дар давоми солҳои 2007-2008 нашр шудаашонро пешниҳод намоянд. Ба асарҳои беҳтарини насрӣ, очерк ва публитсистика, таҳқиқ ва тарҷумаи осори насрӣ ду Ҷоизаи адабии ба номи С. Айнӣ ва барои асарҳои беҳтарини назм, таҳқиқ ва тарҷумаи асарҳои назмӣ ду Ҷоизаи адабии ба номи М. Турсунзода дода мешавад. Муаллифон бояд асарҳояшонро то 10 март ба комиссияи озмун пешниҳод намоянд. Асарҳои пешниҳодшуда дар Раёсати Иттифоқи нависандагон ва баъд дар матбуот муҳокима карда мешаванд. Ғолибони озмун дар арафаи иди Истиқлолияти ҷумҳурӣ муайян карда хоҳанд шуд.