ДАР ДУШАНБЕ ФЕСТИВАЛ-СИМПОЗИУМИ БАЙНАЛМИЛАЛИИ «ФАЛАК» ДОИР МЕГАРДАД

                   Душанбе, 4 март. (АМИТ «Ховар», Бекназари Абӯбакр). — Бо мақсади ривоҷу равнақ додани санъати фалакхонӣ, таҳкими ҳамкориҳои фарҳангӣ, густариши санъати касбии тоҷик, дарки илмии моҳияти фалак ва дуруст муайян намудани мавқеи таърихиву фарҳангии он дар ҷомеа бо Қарори Ҳукумати Ҷумҳурии Тоҷикистон моҳи октябри соли ҷорӣ дар шаҳри Душанбе Фестивал-симпозиуми байналмилалии «Фалак» доир мегардад.                    Тибқи қарори мазкур Вазорати фарҳанги ҶТ вазифадор шудааст, ки то 10 марти соли равон Низомномаи Фестивал-симпозиуми байналмилалии «Фалак»-ро таҳия намуда, онро ба кишварҳои даъватшаванда ирсол намояд. Инчунин, вазорату идораҳои дахлдори ҷумҳурӣ ҷиҳати ташкил ва дар сатҳи баланди касбӣ гузаронидани фестивали мазкур бояд мусоидат намоянд.