ТОҶИКИСТОН ДАР ОЗМУНИ ТЕАТРҲОИ ИДМ ШИРКАТ МЕВАРЗАД

                Маскав, 3 апрел. (АМИТ «Ховар», Ҳалима Хушқадамова). — Театри мусиқии мазҳакавии ба номи Ато Муҳаммадҷонови шаҳри Қӯрғонтеппа дар озмуни байналхалқии чоруми театри ИДМ — «ПРО — театр — 2009» ширкат меварзад. Озмуни мазкур имрӯз дар пойтахти Русия оғоз ёфт. Ташкилкунандаи он Фонди байнидавлатии ҳамкории гуманитарии ИДМ ва вазорати фарҳанги Русия мебошанд. Озмуни нахустини театрҳои ИДМ соли 2006 гузаронида шуда буд. Имсол дар он аз 36 минтақа ва шаҳри Русия 90 гурӯҳи ҳунарӣ ва аз Озарбойҷон, Арманистон, Белорусия, Қирғизистон, Молдавия, Тоҷикистон, Туркманистон, Ӯзбекистон ва Украина 24 театр иштирок хоҳад кард.