МАҶЛИСИ ШЎРОИ ИҚТИСОДИИ ИДМ

                     Кишинев, 19 июн. (АМИТ «Ховар», Наргис Бояхмедова).- Имрӯз дар шаҳри Кишинев маҷлиси 42-юми Шӯрои иқтисодии ИДМ баргузор мегардад. Дар он 14 масъала, аз ҷумла лоиҳаи созишномаи рушди якҷояи шабакаи роҳҳои нақлиётии байналхалқӣ дар қаламрави давлатҳои Иттиҳод муҳокима карда мешаванд. Созишномаро иштирокчиёни машварати нақлиётии ҳамоҳангсози давлатҳои ИДМ ва Шӯрои нақлиёти роҳи оҳани ИДМ ҳамроҳи Кумитаи иҷроияи ИДМ ба муҳокима пешниҳод намудаанд.                     Дар маҷлис инчунин созишномаи ҳамкории давлатҳои ИДМ дар соҳаи истифодаи хатҳои байнидавлатии интиқоли барқ баррасӣ карда мешавад. Онро Шӯрои энергетикии ИДМ ҳамроҳи Кумитаи иҷроияи Иттиҳод тайёр намудаанд. Дар маҷлиси Шӯрои иқтисодӣ масъалаи ташкили гурӯҳи кории таҳияи лоиҳаи барномаи байнидавлатии мақсадноки ҳамкории давлатҳо дар соҳаи сармоягузорӣ дар давраи то соли 2020 мавриди баррасӣ қарор дода хоҳад шуд.