МУҲОКИМАИ ПЕШНИҲОДИ ТОҶИКИСТОН ДАР МАҶЛИСИ ЮНЕСКО

                       Душанбе, 20 июн. (АМИТ «ховар», Наргис Бояхмедова).- Аз 22 то 30 июни соли равон дар шаҳри Севили Испания маҷлиси навбатии 33-юми ЮНЕСКО баргузор мегардад. Дар он пешниҳоди Тоҷикистон дар бораи шомил сохтани Боғи миллии Тоҷикистон (Кӯҳистони Помир) ба Феҳрасти мероси ҷаҳонии ЮНЕСКО мавриди муҳокима қарор дода хоҳад шуд. Аз дафтари матбуоти вазорати корҳои хориҷӣ ба АМИТ «Ховар» хабар доданд, ки дар ин маҷлис пешниҳодҳои Қирғизистон ҳам дар ин масъала баррасӣ карда мешаванд.                      Қайд кардан лозим аст, ки то ҳол ягон ёдгории фарҳангӣ ё табиии Тоҷикистон ва Қирғизистон ба Феҳрасти мероси ҷаҳонӣ дохил карда нашудааст. Феҳрасти мазкур аз минтақаи Осиёи Марказӣ танҳо 10 ёдгории қадимаи фарҳангиро дар бар мегираду халос.                      Аз Тоҷикистон дар маҷлиси ЮНЕСКО сармутахассиси шӯъбаи мамнӯъгоҳҳо ва ёдгориҳои таърихию табиии Муассисаи давлатии мавзеъҳои табиии махсус муҳофизашавандаи Кумитаи ҳифзи муҳити зисти назди Ҳукумати Ҷумҳурӣ Адо Цой иштирок менамояд.