НАМОЯНДАИ ТОҶИКИСТОН ДАР ТЕҲРОН БА ФАЪОЛИЯТ ШУРӮЪ МЕНАМАОЯД

                   Душанбе, 19 июн.(АМИТ «Ховар» Марзия Саидова).- «Дар назди Сафорати Тоҷикистон дар Теҳрон намояндаи масъули Тоҷикистон дар масъалаи тавсеаи ҳамкорӣ дар бахши маориф ба фаъолият шурӯъ менамояд», изҳор дошт дар ҷараёни мулоқоташ Сафири фавқулодда ва мухтори Ҷумҳурии Тоҷикистон дар Ҷумҳурии Исломии Эрон Рамазон Мирзоев зимни боздидаш аз маҳалли нави муассисаи фарҳангии ЭКО ва мулоқоташ бо мудири муассисаи мазкур Муҳаммад Раҷабӣ. Ин иқдом, афзуд Рамазон Мирзоев, дар ҳамоҳангӣ бо Вазорати маорифи Тоҷикистон андешида шуда, мақсади он ҷалби донишҷӯёни эронӣ ба донишгоҳҳои Тоҷикистон ва донишҷӯёни тоҷик ба донишгоҳҳои ин кишвар аст.                    Дар мулоқот мусоҳибон ҳамчунин масъалаҳои дигари мавриди таваҷҷӯҳро баррасӣ намуда, нақши сармоягузорони эрониро дар бунёди нерӯгоҳи барқи обии «Сангтӯда-2» ва туннели «Истиқлол» муҳим арзёбӣ карданд.                   Мусоҳибон тақвияти ҳамкориро дар масъалаҳои сармоягузории хориҷӣ, рушди ҳамкории илмию фарҳангӣ, бахусус, ҳунарҳои дастӣ, ва туризм аз самтҳои афзалиятноки ҳамкории Тоҷикистон бо кишварҳои аъзои ЭКО арзёбӣ карданд.                  Коршиноси тоҷик дар умури фарҳанги муассисаи ЭКО Шохмансури Шохмирзо иттилоъ медиҳад, ки Сафири Тоҷикистон дар Эрон Рамазон Мирзоев баъд аз мулоқоташ бо мудири муассисаи фарҳангии ЭКО М. Раҷабӣ, барои хабарнигорон мусоҳибаи матбуотӣ ороста, ба саволҳои онҳо доир ба тавсеаи ҳамкории Тоҷикистону Эрон дар доираи фаъолияти ЭКО посухҳои мушаххас дод.