ОНҲО АВВАЛИН МУАЛЛИМАҲО БУДАНД

                    Рашт 22 июн. (АМИТ «Ховар», М.Ризвонов).-Моҳи июни соли 1929 дар мактабҳои ибтидоии собиқ ноҳияи Ҳоит чор нафар духтарони озодандеш Оламбӣ Қосимова, Маълумбӣ Гадоева, Сайрамбӣ Фақирова ва Файзинисо Шоназарова ба касби пуршарафи омӯзгорӣ машғул буданд. Ба ноҳияи Ҳоит дастаи мухолифони давлати Шуравӣ бо сарварии Фузайл Махсум ҳуҷум намуданд ва баъди ҷанги кӯтоҳмуддат Ҳоитро дар қатори ноҳияҳои Ҷиргатол ва Қалъаи лаби обу Сангвору Тавилдара зери тасарруфи худ дароварданд. Баъди ишғоли Ҳоит тарафдорони сохти нав ва хизматчиёни давлатиро ба асорат гирифтанд.Раиси деҳшӯрои Ҳоит Чилабибӣ Ҳакимова,ки соле пештар муаллимаи мактаб буд,асир афтод.Аз муаллимаҳо Файзинисо Шоназарова худро аз болои пули Оби кабуд партофт. Ӯро дар поёни Ҳоит одамон аз об дар ҳолати мадҳушӣ бароварданд.Се нафар муаллима дастгир гардид.Чилабибӣ Ҳакимоваро бинобар ҳомиладор буданаш аз ҷазо озод карданд,аммо се нафар муаллимаро ба дор кашида ваҳшиёна қатл намуданд.                   Мақбараи муаллимаҳо дар ҳавлии мактаби таҳсилоти миёнаи умумии №22 деҳаи Ҳоит чой гирифтааст. Хонандагони мактаб бо сарварии директори он М.Мирзоев дар тозаву озода нигоҳ доштани мақбараи фидоиёни роҳи озодӣ саҳм мегузоранд. Аз мактабҳои дуру наздики ноҳияи Рашт ва ноҳияҳои гирду атроф хонандагон ба хотири 80 солагии шаҳодати аввалин муаллимаҳои Ҳоит ба зиёрати мақбараи эшон меоянд. Ҳар бор директори мактаб аз рӯзгори аввалин занони муборизи Ҳоит баъди Инқилоби октябр ба хонандагон қиссаҳо мегӯяд.