БӮҲРОНИ МОЛИЯВӢ БА ВОРИДОТИ МАБЛАҒҲОИ ИНТИҚОЛӢ ТАЪСИРИ МАН

                          Душанбе, 9 июл. (АМИТ «Ховар», Бекназари Абӯбакр). — Бӯҳрони ҷаҳонии молию иқтисодӣ ба кам шудани ҳаҷми воридоти маблағҳои интиқолии шаҳрвандон ба ҷумҳурӣ таъсири амиқи худро расонид. Ин нуқтаро раиси Бонки давлатии амонатгузории Ҷумҳурии Тоҷикистон «Амонатбонк» Маҳмадамин Маҳмадаминов зимни нишасти матбуотӣ 8 июл зикр кард.                          Ӯ афзуд, ки дар ин давра ба шӯъбаҳои БДА «Амонатбонк» 85,5 миллион доллари ИМА маблағ ворид шудааст, ки нисбат ба ҳамин давраи соли гузашта 39 фоиз кам мебошад. Имрӯз «Амонатбонк» бо 11 низоми интиқоли маблағ ҳамкорӣ дорад, ки фаъолияти онҳо дар ҳамаи шӯъбаҳои бонк ба роҳ монда шудааст.                          Роҷеъ ба нафақапулиҳои нафақахӯрони ҷумҳурӣ М. Маҳмадаминов тазаккур дод, ки шумораи нафақахӯроне, ки аз ҷониби БДА «Амонатбонк» ба онҳо хизмат расонида мешавад, зиёда аз 531 ҳазор нафарро ташкил медиҳад. Дар шашмоҳаи аввали соли ҷорӣ аз тарафи Агентии давлатии суғуртаи иҷтимоӣ ва нафақаи Вазорати меҳнат ва ҳифзи иҷтимоии аҳолӣ барои пардохти нафақа 247,1 миллион сомонӣ ба суратҳисоби муассисаҳои «Амонатбонк» маблағ ворид карда шуд, ки аз ин ҳисоб 246,5 миллион сомонӣ нафақапулӣҳо пардохт гардид.