ДАР БАДАХШОН ҚОЧОҚЧИИ АФҒОН ДАСТГИР ШУД

                Душанбе, 20 июл. (АМИТ «Ховар», Анварбек Сиддиқов).- 18 июл, дар доираи амалиёти «Кӯкнор-2009» кормандони раёсати Агентии назорати маводи нашъаовари назди Президенти ҷумҳурӣ дар ВМКБ дар натиҷаи гузаронидани амалиёти махсус як роҳи интиқоли маводи нашъадори қочоқчиёнро аз Ҷумҳурии Исломии Афғонистон ба Ҷумҳурии Тоҷикистон бастанд.                 Тавре ба АМИТ «Ховар» аз АНМН хабар доданд, ҳангоми убур кардани сарҳади давлатӣ аз дарёи Панҷ дар наздикии деҳаи Ниводак шаҳрванди Ҷумҳурии Исломии Афғонистон Искандар валади Шозиёро боздошт намуданд. Ҳангоми кофтуков аз маводи худсохти шиноварии ӯ як халта, ки дар дохилаш маводи нашъаовар буд, ёфт ва мусодира гардид.                 Мувофиқи санҷиши лаборатории раёсати Агентии назорати маводи нашъаовари назди Президенти ҷумҳурӣ дар ВМКБ маводи номбурда ҳашиш буда вазнаш 18 кг 400 гр- ро ташкил дод.                Оид ба ин қазия парвандаи ҷиноӣ боз гардид.