ДАР ДУШАНБЕ МАҶЛИСИ ШЎРОИ МАСЪАЛАҲОИ ҶАВОНОНИ ИДМ БАРГУЗОР МЕГАРДАД

                  Душанбе, 2 июл. (АМИТ «Ховар», Пайрав Назаров).-3-4 июл дар шаҳри Душанбе маҷлиси навбатии Шӯрои масъалаҳои ҷавонони давлатҳои ИДМ баргузор мегардад. Аз Кумитаи кор бо ҷавонон, варзиш ва сайёҳии назди Ҳукумати Ҷумҳурӣ ба АМИТ «Ховар» хабар доданд, ки маҷлиси мазкур дар чаҳорчӯбаи соли ҷавонони ИДМ гузаронида мешавад. Дар маҷлис лоиҳаи барномаи стратегии ҳамкории байналхалқии созмонҳои ҷавонони давлатҳои ИДМ баррасӣ карда хоҳад шуд, ки онро вазорати маорифи Белорусия таҳия ва пешниҳод намудааст.                 Ҳадафи барнома баланд бардоштани рӯҳияи худшиносии миллию шаҳрвандии ҷавонон, тарғибу ташвиқи принсипҳои таҳаммулпазирӣ, афзун гардондани фаъолияти зеҳнӣ, эҷодӣ ва варзишии ҷавонон мебошад. Амалӣ сохтани барнома ба ҷавонон имкон хоҳад дод, ки дар ҳаёти иҷтимоию иқтисодӣ, сиёсӣ ва фарҳангии ҷомеа фаъолонатар ширкат варзанд. Барнома ба бунёди низоми томи гузаронидани тадбирҳои анъанавӣ дар соҳаи сиёсати ҷавонон мусоидат менамояд.                 Иштирокчиёни маҷлис инчунин масъалаҳои дастгирии ҷавононро дар давраи бӯҳрони ҷаҳонии молиявию иқтисодӣ, ҷараёни иҷрои нақшаи тадбирҳои афзалиятноки ҳамкории гуманитарии давлатҳои ИДМ ва ғайраро мавриди баррасӣ қарор медиҳанд.