КОРХОНАҲОИ САНОАТИИ ПОЙТАХТ АЗ САНҶИШ ГУЗАРОНИДА МЕШАВАНД

                    Душанбе, 15 июл.(АМИТ «Ховар», Марзия Саидова).-Раиси шаҳри   Душанбе Маҳмадсаид Убайдуллоев дар ҷаласаи назоратии Мақомоти иҷроияи ҳокимияти давлатии шаҳри Душанбе ба муовини соҳавии худ оид ба саноат Маъруф Сайфиев дастур дод, ки дар мӯҳлати се моҳ ҳолати корхонаҳои саноатии хусусигардидаи пойтахтро мавриди санҷиш қарор дода, аз натиҷааш ба унвонии шаҳрдорӣ ахбор пешниҳод созад.             Инчунин, бо мақсади таъмини истифодаи сарфакоронаи нерӯи барқ ва ҷилавгирии талафоти он ба масъулини сохторҳои зертобеи ШСХК «Барқи тоҷик» супориш дода шуд, ки назорат ва корҳои фаҳмондадиҳиро дар байни муштариён пурзӯр намоянд.             Ҳамзамон, Раиси шаҳр аз роҳбарони субъектҳои хоҷагидори хизматрасони коммуналӣ, ки дар тавозунашон қубурҳои муҳандисӣ доранд, талаб намуд, ки дар ҳамкорӣ бо раисони ноҳияҳои пойтахт масъалаи бо сарпӯшҳо таъмин кардани чоҳҳои муҳандисиро ҳаллу фасл намоянд.