МАҶЛИСИ МИЛЛӢ ҚОНУНИ ПУЛАКӢ ШУДАНИ РОҲҲОРО ҶОНИБДОРӢ

                   Душанбе, 23 июл.(АМИТ «Ховар», Марзия Саидова).-Аъзои Маҷлиси миллии Маҷлиси Олии Ҷумҳурии Тоҷикистон дар иҷлосияи 20-уми палатаи болоии парлумони кишвар 23 июл Қонуни Ҷумҳурии Тоҷикистон «Дар бораи ворид намудани тағйирот ба Қонуни Ҷумҳурии Тоҷикистон «Дар бораи роҳҳои автомобилгард ва фаъолияти роҳдорӣ»-ро ҷонибдорӣ намуданд. Дар асоси ин қонун дар Тоҷикистон роҳҳо пулакӣ мегарданд. Дар аксар кишварҳои мутараққии дунё дар ҳоле роҳҳо пулакӣ мешаванд, ки дар паҳлӯяшон роҳҳои алтернативии бепул вуҷуд дорад. Мутаассифона Ҷумҳурии Тоҷикистон бо мавқеияти ҷуғрофии худ, ки 93-% -аш кӯҳистон аст сохтмони роҳҳои алтернативии бепул дар кишварамон аз имкон берун мебошад.                  Тавре дар иҷлосия зикр гардид ин қонун бо мақсади дар ҳолати хуби истифодабарӣ нигоҳ доштани роҳҳои ҷумҳурӣ, фароҳам овардани шароити мусоиди хизматрасонӣ барои ронандагон ва мусофирон, тибқи меъёрҳои ҷаҳонӣ таъмиру таҷдиди хушсифати онҳо таҳия ва қабул карда шудааст.                   Бояд тазаккур дод, ки қонуни мазкурро моҳе қабл, аниқтараш, 23 июн вакилони палатаи поёнии парлумони мамлакат баррасӣ ва қабул намуда буданд. Зимни муҳокимаи он вакилони Маҷлиси намояндагон Юсуфҷон Ахмедов ва Шодӣ Шабдолов мухолифи пулакӣ намудани роҳҳои ҷумҳурӣ гардида, таъкид карда буданд, ки ворид намудани тағйирот ба қонуни мазкур ба моддаи 24 -и Конститутсияи Ҷумҳурии Тоҷикистон мухолиф буда, ҳуқуқу озодиҳои шаҳрвандонро маҳдуд менамояд.                   Интизор меравад, ки Қонуни мазкур рӯзҳои наздик аз ҷониби Президенти мамлакат ба имзо расида, мавриди амал қарор бигирад.