ТӮҲФА БА ҶАШНИ ЗАБОН

                  Душанбе, 13 июл.(АМИТ «Ховар», Марзия Саидова).- «Забони ман ҷаҳони ман», «Шаҳбози сухан», «Панҷ авранг» ва «Чаҳор гулзор» чунин ном доранд китобҳое, ки Бунёди байналмилалии забони тоҷикӣ (форсӣ) онҳоро то ҷашни 20-солагии қабули Қонуни забон, ки 22 июл таҷлил мегардад, нашр менамояд.                  Раиси Бунёди байналмилалии забони тоҷикӣ Усмон Назир зимни сӯҳбат ба хабарнигори АМИТ «Ховар» гуфт, ки дар китобҳои мазкур сухан дар бораи покизагию ҳифзи забони давлатӣ ва рушди забони тоҷикӣ, инчунин, доир ба панду андарзҳои бузургони миллати тоҷик -Зардушт, Имоми Аъзам ва арҷгузоштан ба фарҳангу тамаддуни миллатамон меравад.                   Бояд зикр кард, ки Бунёди байналмилалии забони тоҷикӣ ҳамчун созмони ҷамъиятии фарҳангӣ 20 сол аст, ки фаъолият менамояд. Он бо кӯшишҳои худогоҳонаи зиёиёни равшандил бо мақсади ҳифз ва густариши забони давлатӣ таъсис дода шудааст.