ТАҶЛИЛИ РӮЗИ МИЛЛИИ ШВЕЙТСАРИЯ

                   Душанбе, 28 июл. (АМИТ «Ховар», Лутфия Эшонқулова).- 1 август дар Агентии ҳамкории байналхалқии Швейтсария дар Душанбе ба муносибати Рӯзи миллии Швейтсария ва 718 солагии ташкили Конфедератсияи Швейтсария маҷлиси ботантана баргузор мегардад. Ба он намояндагони созмонҳои байналхалқӣ, сафоратхонаҳо ва намояндагони аҳли ҷамъияти Тоҷикистон даъват карда шудаанд.                     Мухбири АМИТ «Ховар» хабар медиҳад, ки рӯзи 1 август рӯзи ташкили Конфедератсияи Швейтсария ба шумор меравад. Ҷашни мазкур аз соли 1291 то имрӯз таҷлил карда мешавад. Ҳамон сол се вилояти ба ҳамдигар душмани ин мамлакат — Ури, Швитс ва Унтервалден барои дастгирии ҳамдигар ва ҳифзи манфиатҳои умумиашон созишнома имзо карда буданд. Чунин шуморида мешавад, ки маҳз ҳамин созишнома ба ташкили давлати ягонаи Швейтсария ибтидо гузоштааст.