ВКХ ТОҶИКИСТОН МУБОҲИСАРО ДАР БОРАИ ЗАБОН ШАРҲ МЕДИҲАД

                   Душанбе, 31 июл. (АМИТ «Ховар» — Российская газета ). — Дар арафаи сафари кории Президенти Федератсияи Русия ба Тоҷикистон дар воситаҳои ахбори оммавии Русия як навъ баҳсу мунозираи дорои хусусияти фарҳангӣ ба миён омад. Дар Маскав роҷеъ ба суханронии Президенти Ҷумҳурии Тоҷикистон Эмомалӣ Раҳмон ба муносибати таҷлили 20 — солагии қабули Қонун «Дар бораи забони тоҷикӣ» ва муроҷиатномаи ӯ ба парлумони мамлакат дар бораи ҳар чӣ зудтар қабул намудани Қонуни нав «Дар бораи забони давлатии Ҷумҳурии Тоҷикистон» изҳори ҳайрат ва нобоварӣ карда шуд. Ин ҳуҷҷат забони тоҷикиро забони ягонаи муошират бо мақомоти ҳокимияти давлатӣ ва идорӣ муқаррар менамояд. Минбаъд танҳо ба забони давлатӣ ҳуҷҷатҳо таҳия карда ва маълумот ба даст оварда мешавад, ҳол он ки дар Тоҷикистон аз соли 1989 сар карда, забони тоҷикӣ ҳамчун забони давлатӣ ва забони русӣ ҳамчун забони муоширати байни миллатҳо муқаррар гардида буданд.                    Ёвари Президенти Русия Сергей Приходко дар робита изҳор намуд, ки ин проблемаи он қадар душвор нест ва дар Русия сабаби ба миён омадани ташвиши ҷиддӣ намегардад. Вале ба ҳар ҳол бояд ин масъала шарҳ дода шавад. Ба боқӣ мондани забони русӣ дар Тоҷикистон бештар худи тоҷикон манфиатдоранд, зеро агар дар Тоҷикистон аз истифодаи забони русӣ даст кашанд, ягон мардикори тоҷик дар Русия кору зиндагӣ карда наметавонад, гуфт С.Приходко.                   Вазорати корҳои хориҷии Тоҷикистон бо талаби Маскав ин масъаларо шарҳ дода, изҳор намуд, ки нақши забони русӣ ҳамчун забони муоширати байни миллатҳо дар моддаи дуюми Конститутсияи Ҷумҳурии Тоҷикистон ҳукми қонунӣ гирифтааст ва онро то имрӯз касе бекор накардааст. Дар Кремл қабл аз сафари Д.Медведев ба Душанбе ишора карда шуд, ки зимни мулоқоти президентҳои ҳар ду мамлакат ин масъала ба миён гузошта хоҳад шуд. Вале ёвари Президенти Русия баъдан зикр намуд, ки Маскав дар ин бобат ба Душанбе ягон даъво надорад. Зеро шарҳи вазорати корҳои хориҷии Тоҷикистон ҷониби Русияро комилан қонеъ гардондааст.                   Агентии дигари иттилоотӣ СА — НЮС менависад, ки вазири корҳои хориҷии Русия Сергей Лавров ҳароҳи Президенти мамлакат дар Душанбе қарор дорад ва изҳор кардааст, ки дар ин масъала шарҳи ҷониби Тоҷикистонро интизор аст. Вале ёвари Президенти Русия зикр намуд, ки дар ин масъала додани ягон шарҳу эзоҳ зарурат надорад. Зеро Президенти Тоҷикистон қотеъона зикр намуд, ки забони русӣ дар мамлакат мисли пештара дар ҳамаи соҳаҳо истифода бурда мешавад. Қайд карда шуд, ки ҷараёни ташаккул ва рушди забони тоҷикӣ бояд дар асоси қонун ба низом дароварда шавад ва ин хусусияти табиӣ дошта, кори дохилии давлати Тоҷикистон мебошад.                  Қайд кардан лозим аст, ки Ҳукумати Тоҷикистон барои омӯзиши ҳамаҷонибаи забони русӣ тадбирҳои самарабахш меандешад. Дар Тоҷикистон теъдоди мактабҳое бисёранд, ки дар онҳо ба забони русӣ таълим дода мешавад. Русия кӯшишҳои Тоҷикистонро дар ин самт дастгирӣ намуда, мактабҳои Тоҷикистонро бо китоб таъмин намуда, маҳорати муаллимони забони русиро такмил дода ва дар Тоҷикистон филиалҳои мактабҳои олии худро мекушояд. Тарҷумон — Қудратов А.