ДАРГУЗАШТИ ШОИР ВА РӮЗНОМАНИГОРИ МАЪРУФИ ТОҶИК

                  Душанбе, 24 август. (АМИТ «Ховар», Бекназари Абӯбакр). — Раёсати Иттифоқи нависандагони Тоҷикистон ва Иттифоқи журналистони Тоҷикистон бо андӯҳи гарон хабар медиҳанд, ки 23 августи соли 2009 шоир ва рӯзноманигори маъруфи тоҷик, корманди шоистаи Тоҷикистон, барандаи ҷоизаи адабии ба номи Садриддин Айнӣ Шоҳмузаффар Ёдгорӣ дар синни 69 солагӣ ногаҳон аз олам даргузашт.                  Қобили қайд аст, ки Шоҳмузаффар Ёдгорӣ ибтидои солҳои шастуми асри 20 ба арсаи адабиёт қадам ниҳода, дар радифи беҳтарин шоирони ҳамсолаш шеър эҷод карда, сазовори маҳбубияти аҳли қаламу хонанда шуд.                  Ашъори Шоҳмузаффар Ёдгорӣ саршори меҳру муҳаббати гарму самимӣ ба Ватан, модар, ҳисси баланди худшиносиву меҳанпарастӣ буда, инсонро ба роҳи росту покизагӣ ҳидоят мекунад.                  Китобҳояш «Як шоха гул», «Даргоҳи деҳқон», «Симои халқ», «Ҳар тори мӯ вафоям» ва ғайра дар адабиёти тоҷик нақши босазо доранд.                  Асарҳои шоир ба бисёр забонҳо тарҷума ва нашр шудаанд. Шоҳмузаффар Ёдгорӣ романҳои «Васваса» ва «Талош» иборат аз се қисмро ба анҷом расонд, ки аз ҳаёти муосиронамон ҳикоят мекунанд.                  Хотираи дурахшони шоир ва рӯзноманигори маъруфи тоҷик Шоҳмузаффар Ёдгорӣ дар қалби хонандагону ҳамқаламон боқӣ хоҳад монд.