ГӮШТИНГИРОН ДАР РӮШОН ҚУВВА МЕОЗМОЯНД

                 Душанбе, 10 август. (АМИТ «Ховар», Ибодат Давлатова). — Аз 15 то 16 августи соли равон мусобиқаи кушоди инфиродии ҷумҳуриявӣ оид ба гӯштини миллӣ ба хотири гиромидошти А. Олимов дар ноҳияи Рӯшони ВМКБ гузаронида мешавад.                 Тавре аз маркази матбуоти Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон иттилоъ доданд, дар мусобиқаи мазкур варзишгарон аз руи вазнҳои 55, 60, 65, 70, 75, 80, 86, 95 кг ва дар вазни мутлақ иштирок мекунанд.                  Дар он аз вилояти Суғд 1 даста, вилояти Хатлон 2 даста, ВМКБ 3 даста, ноҳияи Рӯшон 1 даста, шаҳри Душанбе 3 даста, мактаби ҷумҳуриявии маҳорати олии варзишӣ оид ба намуди гӯштин 1 даста қувваозмоӣ мекунанд.                 Ғолибони мусобиқа, бо диплому медалҳои Кумитаи ҷавонон, варзиш ва сайёҳии назди Ҳукумати ҶТ ва бо тӯҳфаҳои хотиравӣ сарфароз гардонида мешаванд.