«ГУЛДАСТ» ИНШООТИ НАВ МЕСОЗАД

                   Мӯъминобод, 10 август. (АМИТ «Ховар», Сулаймон Холов).- Ҷамъияти дорои масъулияти маҳдуди «Гулдаст»-и ноҳияи Мӯъминобод ба сохтмони бинои нави ҷамоати шаҳраки Ленинград шурӯъ кард. Холназар Чориев, сардори ҷамъият, вобаста ба ин мавзӯъ гуфт: «Бинои мазкур аз ду ошёна ва 15 утоқи корӣ иборат буда, маблағи умумии он беш аз 910 ҳазор сомониро дар бар мегирад». Чориев афзуд, ки айни ҳол 15 нафар коргар ба корҳои сохтмонӣ сафарбар гардидааст. Ба гуфтаи ин манбаъ маблағгузорӣ аз тарафи раёсати сохтмонии вилоят амалӣ гардида, сари вақт таъмин мегардад. Гуфта мешавад ҶДММ «Гулдаст» тӯли шаш моҳи соли ҷорӣ ба маблағи 439 100 сомонӣ корҳои сохтмониро ба итмом расонидааст.