НАҚШИ КОНСТИТУТСИЯ ДАР ҲАЁТИ ҶАВОНОН

                   Душанбе, 17 август. (АМИТ «Ховар», Ибодат Давлатова). — Бахшида ба 15 солагии Конститутсияи Ҷумҳурии Тоҷикистон, Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон нақшаи кориро таҳия намуд. Тибқи он дар тамоми муассисаҳои таълимию қисмҳои низомӣ ва он ҷойҳое, ки ҷавонон фаъолият доранд чорабиниҳои гуногунро баргузор менамояд.                   Тавре ба мухбири АМИТ «Ховар» мудири бахши тарбияи ватанпарастии ҷавонон ва кор бо толибилмони Кумитаи ҷавонон, варзиш ва сайёҳӣ Абдураҳмон Хонов иттилоъ дод, чорабиниҳои мазкур аз 25 август то охири моҳи ноябри соли равон дар марказҳои фарҳангии ҷовонони Тоҷикистон таҳти унвони «Нақши Конститутсия дар ҳаёти ҷавонон» баргузор мегарданд.                    Инчунин, ӯ қайд намуд, ки «мо аллакай аз ҳисоби олимону донишмандон ва мутахассисони соҳаи ҳуқуқ як гурӯҳи таблиғоти таъсис додем, ки ин чорабиниҳоро амали месозанд.                    Ҳадаф аз ташкил ва баргузор намудани ин чорабиниҳо пеш аз ҳама ин баланд бардоштани фарҳанги сиёсии ҷавонон, маърифати ҳуқуқии онҳо, ҳамчунин ба ҷавонон фаҳмондани мазмуну моҳияти давлати ҳуқуқбунёд, демократӣ ва дунявӣ мебошад».