ТАНЗИМИ РАВАНДИ МУҲОҶИРАТИ КОРӢ ДАР ҶУМҲУРӢ

               Душанбе, 18 август. (АМИТ «Ховар», Лаззат Диловарзод).- Аз Хадамоти муҳоҷирати Вазорати корҳои дохилӣ иттилоъ доданд, ки хадамоти мазкур раванди муҳоҷирати кориро дар ҷумҳурӣ нисбат ба шаҳрвандони хориҷӣ ба танзим медарорад.               Боиси ёдоварист, ки дар асоси барномаҳое, ки дар ҷумҳурӣ роҳандозӣ шудаанд, ширкатҳои хориҷӣ баробари сармоягузориашон дар амалӣ шудани барномаҳо дар Тоҷикистон аз мутахассисон ва шаҳрвандони бетабаа низ истифода мекунанд.               Аз ин рӯ онҳоро зарур аст, ки фаъолият ва мӯҳлати будубоши шаҳрвандонашонро дар асоси қонунгузории Ҷумҳурии Тоҷикистон ба роҳ монанд.               Рейди кормандони Хадамоти муҳоҷирати Вазорати корҳои дохилӣ нишон дод, ки дар 29 ҳолат нисбати шаҳрвандони хориҷӣ, ки дар Тоҷикистон кору зиндагӣ доранд, барои вайрон кардани мӯҳлати будубош чораҳои маъмурӣ дида шуд. Як қисми онҳо ҷарима андохта шуданд ва ҳатто барои дағалона вайрон кардани мӯҳлати будубош чанд шаҳрванди хориҷӣ аз қаламрави ҷумҳурӣ хориҷ карда шуданд.