ТАРКИШ ДАР НАЗДИКИИ НАМОЯНДАГИИ НАТО

                     Кобул, 17 август. (АМИТ «Ховар» — Вести.ру). — Котиби матбуоти Қувваҳои муттаҳидаи низомии хориҷӣ дар Афғонистон хабар дод, ки як нафар террористи фидоӣ рӯзи шанбе мошини сабукрави пур аз маводи таркандаро дар наздикии даромадгоҳи намояндагии НАТО дар шаҳри Кобул тарконд. Дар маҳалли таркиш якчанд мошин даргирифта, дарахтон решакан гардида, биноҳои наздик хароб шуданд. Дар наздикии маҳалли таркиш биноҳои сафоратхонаи ИМА ва Британияи Кабир воқеъ буданд. Баъди таркиш аскарони НАТО ин сафоратхонаҳоро иҳота карданд. Аз рӯи хабарҳои расида, бар асари таркиш миқдори зиёди одамон ҳалоку маҷрӯҳ гардидаанд.                   Шаби гузашта баъзе маҳалҳои шаҳри Кобул ҳадафи оташи миномёт қарор дода шуд. Якчанд гулӯла аз ҷумла, дар наздикии майдони ҳавоии шаҳри Кобул афтода таркид. Хабар дода мешавад, ки масъулияти ин амалиётро ҷунбиши «Толибон» ба зиммаи худ гирифт.                  Рӯзҳои охир фаъолияти гурӯҳҳои силоҳбадасти «Толибон» дар Афғонистон торафт авҷ мегирад. Ба қавли коршиносон, ин ба наздик шудани интихоботи президент вобаста мебошад. «Толибон» мехоҳанд дар байни аҳолӣ воҳима андохта, онҳоро маҷбур созанд, ки аз иштирок дар интихобот даст кашанд.