ТУРКМАНИСТОН ИСТЕҲСОЛУ СОДИРОТИ ҚУВВАИ БАРҚРО ЗИЁД КАРД

                       Душанбе, 13 август. (АМИТ «Ховар» Наргис Бояхмедова). — Сафоратхонаи Туркманистон дар Тоҷикистон ба маълумоти корпоратсияи давлатии энергетики «Туркменэнерго» истинод карда, ба АМИТ «Ховар» хабар дод, ки Туркманистон имсол ба мамлакатҳои хориҷӣ 2,6 миллиард киловват соат барқро фурӯхтан мехоҳад. Туркманистон қувваи барқи худро асосан ба Афғонистону Эрон, Туркияву Тоҷикистон мефурӯшад.                     Дар натиҷаи нимсолаи аввали соли 2009 дар Туркманистон беш аз 7 милиарду 950 миллион киловват соат қувваи барқ истеҳсол карда шуд, ки ин аз соли гузашта 4,3% зиёд мебошад. Дар ин муддат 1 миллиарду 546 миллион киловват соат қувваи барқ содирот шудааст, ки ин 16% аз нимсолаи аввали соли 2008 зиёд аст.                     Айни ҳол, дар Туркманистон бо дастгирии давлат як қатор лоиҳаҳо ба нақша гирифта шудааст, ки он сохтмони нерӯгоҳҳои нави барқӣ ва кашидани хатҳои нави интиқоли барқро пешбинӣ мекунад. Дар назар аст, ки то соли 2020 истеҳсоли қувваи барқ дар Туркманистон 26,38 миллиард киловват соат зиёд хоҳад гашт. Ва содироти барқ ба мамлакатҳои ҳамсоя ба 6 миллиард киловват соат дар як сол мерасад.