ҒАЛЛА ФАРОВОН МЕШАВАД

               Душанбе, 2 сентябр. (АМИТ «Ховар», Кристина Эрлих). – Аз вазорати кишоварзии ҷумҳурӣ ба АМИТ «Ховар» хабар доданд, ки мӯҳлати ҷамъоварии ғалла дар мамлакат то 10 сентяр дароз карда шуд. Сабаби дароз кардани мӯҳлати ҷамъоварии ҳосил нарасидани техникаи ҳосилғундор мебошад. Имрӯз дар хоҷагиҳои мамлакат бештар аз 300 комбайн ва ҳатто комбайнҳои шахсии деҳқонон истифода бурда мешаванд. Аъзои хоҷагиҳо ҳосили қитъаҳои алоҳидаро дастӣ дарав мекунанд.                 Мудири шӯъбаи зироатҳои техникӣ ва ғаллаи вазорати кишоварзӣ Муҳаммади Ормонов зикр кард, ки мувофиқи пешгӯии мутахассисон имсол дар мамлакат бояд ғаллаи фаровон ҷамъ оварда шавад. Пешгӯӣ карда мешавад, ки ҳосили ғаллаи имсола як миллиону 153 ҳазор тоннаро ташкил хоҳад дод. Ба ин ҳосили ҷуворимаккаи барои дон коридашуда, шолӣ ва кишти такрории ғалла дохил намешавад.