ДАР ТУРКИЯ БОРИШИ БОРОН ДАВОМ ДОРАД

                Анқара, 14 сентябр. (АМИТ «Ховар» — Вести.ру). – Хабар дода мешавад, ки дирӯз шаҳри курортии Аланияи Туркияро тӯфони баҳрӣ фаро гирифт. Дар натиҷа 7 нафар, аз ҷумла, сайёҳони хориҷӣ осеб диданд.                  12 сентябр тамоми рӯз дар ин минтақа борони шадид борида, шамоли сахт вазид. Дар натиҷа чандин биноҳо хароб гардиданд. Одамон аз шиддати вазиши шамол ҳатто ба кӯча баромада наметавонистанд.                 13 сентябр дар вилояти Тоҳирдоғ дар натиҷаи борони шадид сел омада, маҳалҳои аҳолинишинро пахш намуд. Мақомоти мамлакат барои ба маҳалли бехатар кӯчондани аҳолӣ қисмҳои ҳарбӣ, аз ҷумла, танкҳо ва чархболҳоро сафарбар намуданд.                 Дирӯз дар ин ҷо корхонаи хишт, ки аз чанд ошёна иборат буд, зери об монд. 200 нафар коргарони он ба воситаи чархболҳо аз маҳалли фалокат бароварда шуданд. Дар вилоятҳои Бурс, Чаноққалъа ва                 Адирни роҳҳои мошингардро сел шуста харобу валангор намуд. Дар вилоятҳои Мерсин ва Адан бориши борон чандин шабонарӯз боз қатъ намегардад.                 Тавре хабар дода шуда буд, дар Истамбул 8 – 9 сентябр бар асари боридани борони шадид ва обхезӣ 33 нафар ҳалок ва 9 нафар бе ному нишон гум шуд. Сели шадид дар давоми рӯзҳои охир сабаби қатъ гардидани ҳаракати тамоми намудҳои нақлиёт гардид.