ХОҶАГИҲОИ ДЕҲҚОНИИ КӮЛОБ ПАХТАЧИНИРО ОҒОЗ НАМУДАНД

                   Кӯлоб, 26 сентябр. (АМИТ «Ховар», Сулаймон Холов).-Дар саросари ноҳияҳои кишвар мавсими ҷамъоварии ҳосили пахтаи соли 2009 шурӯъ гардид. Новобаста ба номусоидии ҳаво деҳқонон дубораю себора кишти такрорӣ гузаронида, бо риояи қоидаҳои агротехникӣ ба нашъунамои хуби майдони пахтазор ноил гардиданд. Дар ноҳияи Кӯлоби вилояти Хатлон яке аз аввалинҳо шуда деҳқонони хоҷагии деҳқонии «Хатлон» ба ҷамъоварии ҳосили пахта оғоз намуданд. Аъзоёни хоҷагӣ ҳамарӯза ба миқдори 100-110 килограмӣ пахта мечинанд, ки давоми 10 рӯзи аввал дар хирманҳои хочагӣ беш аз 150 тонна пахта ҷамъ оварда шуд.                   Дар бригадаи рақами 1-и хоҷагӣ маъракаи ҳосилғундорӣ рӯз аз рӯз авҷ гирифта, аз чиниши аввали пахтазор маълум аст, ки ҳосили имсола нисбати соли гузашта ба маротиб зиёд хоҳад шуд.Бояд қайд намуд, ки соли гузашта аз нарасидани об як қисми заминҳои хоҷагӣ хушкида, ҳосили ба дастомада деҳқононро қаноатманд нагардонида буд. Новобаста ба ин нақшаи ҷамъоварии ҳосилро барзиёд иҷро намуданд. Дар хирманҳои бригадаҳои хоҷагӣ бошад дар мавсими имсола пахтаи хушсифат ҳамарӯза ворид мешавад                    Қайд кардан бамаврид аст, ки хоҷагии деҳқонии «Хатлон» дар ноҳияи Кӯлоб яке аз хоҷагиҳои калони пахтакор ба ҳисоб рафта, деҳқонон соли ҷорӣ дар майдони 471 гектар пахта парвариш намудаанд. Дар ҳолати муташаккилона ҷамъоварӣ намудани ҳосил то охири моҳи октябр хоҷагӣ метавонад нақшаи пахтасупориро иҷро намояд.