КӮМАК БА БЕНАВОЁН

                 Душанбе, 8 сентябр. (АМИТ «Ховар», Мавзуна Бойева).- Ширкати «Индиго Сомонком» ҳамроҳи Шӯрои Уламои вилояти Суғд дар давоми моҳи Рамазон маъракаи хайрияро бо номи «Рамазон-2009» мегузаронад. Дар давоми маърака мизоҷони ширкат ба камбағалону мӯҳтоҷон кӯмак расонда метавонанд.                 Тибқи шарти пешниҳодшуда муштарии ширкат матни кӯтоҳ фиристода ё занг зада ба ивази ин тақвими моҳи рамазонро тӯҳфа мегирад. Ҳар 10 рӯз натиҷаи маърака ҷамъбаст карда мешавад. Маблағи ҷамъшудаи зангҳои телефонӣ ва хабарҳои кӯтоҳ дар байни мӯҳтоҷон тақсим карда мешавад.                Ҷараёни маъракаро комиссияи ҷамъиятӣ дар ҳайати намояндагони маъмурияти вилоят, Шӯрои фаъолони шаҳри Хуҷанд, Фонди хайрияи президенти ҶТ дар Хуҷанд, Раёсати телевизион ва радиои вилояти Суғд, идораи андози шаҳри Хуҷанд, Шӯрои уламои вилоят ва ширкати «Индиго Сомонком» назорат мекунад.                  Маблағи дар давоми 10 рӯзи аввал ҷамъшуда бо қарори комиссия дар байни 520 нафар маъюб аз шаҳру ноҳияҳои вилоят тақсим карда шуд, хабар доданд ба АМИТ «Ховар» аз ширкати «Индиго Сомонком». Худи ширкати «Индиго Сомонком» барои расонидани кӯмак ба мӯҳтоҷон 10 ҳазор сомонӣ ҷудо кард.