«МАКТАБИ МАҲОРАТ» — И ОТАХОН ЛАТИФӢ

                 Душанбе, 17 сентябр. (АМИТ «Ховар», Фарангис Раҳимова). — Имрӯз дар Иттифоқи журналистони ҷумҳурӣ маросими пешниҳоди китоби нав дар бораи журналисти маъруфи тоҷик ва ходими намоёни сиёсӣ Отахон Латифӣ баргузор гардид, ки «Мактаби маҳорат» ном дорад. Онро Маркази тадқиқоти журналистии Тоҷикистон ба чоп тайёр намудааст.                   Дар китоб роҳи эҷодиёт ва таҷрибаи бузурги касбии журналисти маъруф таҳлил карда мешавад, ки мухбири махсуси рӯзномаҳои «Известия» ва «Комсомолская Правда» дар Осиёи Марказӣ буд. Муаллифони асар услуби кор, бозёфтҳои эҷодӣ, тарзи баён, забон ва мавзӯи асару мақолаҳои Отахон Латифиро ҳадафи таҳқиқ қарор додаанд. Муаллифони китоб олимон ва журналистони маъруф Иброҳим Усмонов, Пайванд Гулмуродзода, Ҷовид Муқим ва дигарон мебошанд.                 Китоб бо теъдоди 1000 нусха чоп шуда, дар факултаю шӯъбаҳои журналистикаи мактабҳои олии ҷумҳурӣ, воситаҳои ахбори оммавӣ, созмонҳои байналхалқию ғайриҳукуматӣ ва китобхонаҳои мамлакат паҳн карда мешавад.                Отахон Латифӣ соли 1936 дар ноҳияи Панҷакент таваллуд шудааст. Вай соли 1963 шӯъбаи журналистикаи Донишгоҳи давлатии Ленинградро хатм карда, дар рӯзномаҳои ҷавонони Тоҷикистон кор кардааст. Ӯ мухбири махсуси рӯзномаҳои машҳури «Известия» ва «Комсомолская Правда» буд. Отахон Латифӣ инчунин муаллифи чандин филмномаҳои мустанад мебошад. Ӯ соли 1997 ба комиссияи иловагии масъалаҳои ҳуқуқи Комиссияи оштии миллӣ роҳбарӣ мекард. Шахсони номаълум ӯро 22 сентябри соли 1998 дар назди хонааш ба қатл расонданд.