МАРГИ МУФОҶО

                Душанбе, 8 сентябр. (АМИТ «Ховар», Тахмина Ғоибназарова).- Ҳафтаи гузашта кормандони ШКД-и ноҳияи Ёвон дар рафти амалиёти таъҷилӣ дар қишлоқи Ғарави ҷамоати Даҳана сокини ноҳияи Шуғнони ВМКБ Маҳмадулло Дидорови 24-соларо дастгир карданд. Дар натиҷаи амалиёти тиббӣ аз меъдаи шахси дастгиршуда 65 ғилофаки героин бароварда шуд, ки вазни умумии он 375 грамро ташкил медод.                Ҳамон рӯз дар ҷамоати Гулистони ноҳияи Рӯдакӣ ҷасади марди 45-сола Файзулло Зоиров ёфт шуд, ки дар зери дарахт мехобид, дар паҳлӯи ӯ сӯзандорӯи бо маводи нашъадор олуда ёфт шуд. Аз рӯи ташхиси духтур Ф. Зоиров дар натиҷаи аз ҳад зиёд истеъмол кардани моддаи нашъадор вафот кардааст. Инчунин муайян карда шуд, ки Ф. Зоиров пеш аз ин мувофиқи моддаи 200 КҶ ҶТ «Дар бораи хариду фурӯши ғайриқонунии маводи нашъадор» ҳабс шудааст. Аз рӯи ин воқеаҳо парвандаҳои ҷиноӣ кушода шуд ва тафтиши онҳо давом дорад.