ПЛЕНУМИ 4-УМИ ШӮРОИ СОБИҚАДОРОНИ ҶАНГУ МЕҲНАТИ ҶУМҲУРӢ

                Душанбе, 25 сентябр.(АМИТ «Ховар»,Марзия Саидова).-25 сентябр дар шаҳри Душанбе Пленуми 4-уми Шӯрои собиқадорони ҷангу меҳнати Ҷумҳурии Тоҷикистон баргузор гардид. Дар пленум, ки таҳти раёсати Раиси Шӯрои собиқадорони ҷангу меҳнати ҷумҳурӣ Раҳмат Қудратов баргузор гардид, роҳбарону намояндагони як қатор вазорату идораҳои марбутаи ҷумҳурӣ иштирок карданд.                  Дар пленум масъалаи омодагии ташкилоти собиқадорони ҷангу меҳнати вилояти Суғд ба Ҷашни Ғалаба дар Ҷанги Бузурги Ватанӣ дар партави Қарори Ҳукумати Ҷумҳурии Тоҷикистон «Дар бораи ҷашни 65 –солагии Ғалаба дар ҷанги Бузурги Ватании солҳои 1941-1945» баррасӣ гардид. Доир ба ин масъала Раиси Шӯрои собиқадорони ҷангу меҳнати вилояти Суғд М. Раҳимов гузориш дод. Мавсуф гуфт, ки дар партави Қарори Ҳукумати Ҷумҳурии Тоҷикистон «Дар бораи Ҷашни 65-солагии Ғалаба дар ҷанги Бузурги Ватанӣ» нақша чорабиниҳо, барномаҳои ҷашнӣ тарҳрезӣ гардида, корҳои зиёде ба анҷом расонида шудааст. Инчнунин, аз ҷониби Мақомоти иҷроияи ҳокимияти давлатии вилояти Суғд ба иштирокчиёну собиқадорони ҷангу меҳнат дар арафаи ҳар ид кӯмаки моддӣ расонида шуда, бо мақсади барқарор намудани саломатии онҳо маблағ ҷудо карда мешаванд. Хабарнигори АМИТ «Ховар» иттилоъ медиҳад, ки дар Пленуми чоруми Шӯрои собиқадорони ҷангу меҳнати ҷумҳурӣ, ҳамзамон як қатор масъалаҳои ташкилӣ баррасӣ гардиданд.