АЗ РӮИ МЕЪЁР ДОДАНИ ОБИ ОШОМИДАНӢ

                Душанбе, 16 октябр. (АМИТ «Ховар», Лаззат Диловарзод).- Тибқи маълумоти корхонаи обу корези шаҳри Кӯлоб ба сокинони шаҳр дар як шабонарӯз 2500 м3 оби ошомиданӣ дода мешавад. Сокинони шаҳр аз он изҳори норозигӣ доранд, ки ин миқдор об барои Кӯлоб барин шаҳри сераҳолӣ басанда нест.                 Ба гуфти сардори корхонаи обу корези шаҳр Сафар Мардон, ин миқдор об барои шаҳр корхона ва сокинони он басанда аст.                 Дар сурати ғайримақсаднок истифода шудани об, ки мардум боғу роғашонро ҳам бо оби софи истеъмолӣ обёрӣ мекунанд, пайдо шудани мушкилоти норасоии оби нӯшокӣ сарфи назар нест.                  Баъзе ташкилоту корхонаҳое, ки аз оби нӯшокӣ танқисӣ мекашанд, сабабаш шартнома набастани онҳо бо идораи обу корези шаҳр аст,- мегӯяд Сафар Мардон.                Алҳол дар шаҳри Кӯлоб тибқи санадҳои расмӣ, қиммати 1 м3 оби нӯшокӣ барои хоҷагиҳои худмаблағгузор 66 дирам, корхонаю ташкилоти давлатӣ — 57 ва барои аҳолӣ 28 дирам муайян шудааст.                Маблағи пардохт нашудаи аҳолӣ, идораю корхонаҳо наздик ба 2 млн сомонӣ баробар аст, ки дар сурати саривақт пардохт нашудани он, мушкилоти таъмини об бештар хоҳад шуд.