ДАРАВИ ГАНДУМ БА ОХИР РАСИД, КӮФТАНИ ОН ДАВОМ ДОРАД

                Душанбе, 7 октябр. (АМИТ «Ховар», Лаззат Диловарзод).- Мутобиқи маълумоти фаврии Раёсати растанипарварии Вазорати кишоварзӣ, соли ҷорӣ дар ҷумҳурӣ ҷамъоварии гандум аз майдони 253,8 ҳазор гектар саривақтӣ анҷом дода шуда, кӯфта гирифтани он дар як қисм ноҳияҳои дурдасти кӯҳистон давом дорад.                 Тибқи маълумоти ҳамин манбаъ, ҳосили ҷамъоваришудаи гандум наздик ба 1 млн. тонна расонида шудааст. Бори аввал аст, ки дар давоми мавҷудияти таърихи кишвар чунин миқдори гандум ҷамъоварӣ мешавад.                Агар ҳосилнокии гандум дар соли 2008 аз ҳар гектар 18 сентнериро ташкил дода бошад, дар соли ҷорӣ он ба 27 сентнерӣ расонида шудааст.                  Ба гуфти мутахассисони соҳа натиҷаи баланд шудани ҳосил ин пеш аз ҳама ба тухмии хушсифате вобаста аст, ки соли гузашта аз хориҷи кишвар ворид ва барои кишт ба хоҷагиҳои деҳқонӣ тақсим карда дода шуда буд.